9/30/16

#cyberzen: Cybercultura


Va una píldora colorada:

Internet ye una tecnoloxía cybertelepática. Lo que les feromones y la magnetorretención a les formigues.






1/15/14

Nun me perdí


Anque escoyí garrar cada dirección prohibida
y m'enfoté en pronunciar cada palabra castigada,
siempre "adiós" cuando yera "ven",
tarazando adulces los filos d'Ariadna,

anque los caminos se dilieron na nueche
y la ñube del tiempu anubrió les estrelles
tan escuro que nun fui a saber ónde finaben les solombres
y ónde entamaba'l mio corazón,

anque escoyí lluchar nes batalles perdíes
y falar na llingua de los que ni llingua tienen,
afuxir de la ciudá tres d'un rellumu de lluna
que s'esmuz ente les manes cada vez que lu abrazo,

anque alcé les mios veles sólo en mares de ñebla
y regalé la mio brúxula a cambiu d'un suañu
que navegó al debalu ensin mieu a la tierra
y naufragó ente cantiles d'asfaltu,

yo, sé que nun me perdí

porque cada pasu que di

me llevó

hasta ti.


_____________

11/18/13

Tesoru


Aire na yerba, sol nel to pelo,
palabres que caen, muertes
como les fueyes caen,
dando'l so cuerpu a la tierra
de rosales que, en floreciendo,
serán abellugu d'otros versos.

Aire seroñu, sol d'iviernu
dibuxando la persiana na to piel,
mirándote a los güeyos nel espeyu,
un respigu d'un suañu mozu nesti mundu vieyu,
n'otra casa,
n'otru cuerpu.

Esi tesoru te dexo.

_________________

6/13/13

Naide sintió
acullá del negror del cielu
una nota grave y rota
afinada coles sos coraes
garrada al so sangre

más pesada que la so alma
más llarga que la vida

más fuerte que'l so amor
más grande que'l Sol

(y llexones d'animales
bendites de sordera
tremaben ciegues 

al so son na nueche)

Om
boca abierta de la Nada
horror del Tou:

Déxame marchar d'equí.
Escaezámonos.
Como les coses muertes escaecen les vives
y les vives
a les muertes






4/6/12

#cyberzen: La solombra


Y el maestru entrugó a los sos discípulos:

—¿Quién ye'l meyor d'ente los que me siguen?
—Yo, maestru, yo soi'l to más fiel discípulu —contestó unu.
—Naide —dixo otru.
—Non —retrucó'l maestru—. El meyor siguidor míu ye la mio solombra: siempre detrás, camina onde yo camino, observa lo que yo observo y ye lo que yo soi... un segundu depués de que yo lo seya.

Pero la solombra del maestru nunca nun será'l maestru: namás pue siguilu. 

Sé solombra
o sé maestru.

7/25/11

cyberzen #1

Recuerda: 
Hai un estrañu placer n'olvidar los meyores recuerdos. 



5/25/11

L'alarma (25 de mayu de 1808).

Nun día como hoi, unu más nesti estáu permanente de mentira política, ente reflexones electorales d'a media perrona y declaraciones prefabricaes en think-tanks a sueldu, paezme sano re-lleer les pallabres d'otros políticos asturianos, yá muertos y escaecíos, qu'entendieron el so llabor pol país (con estes lletres) d'una miente valiente, pero igual de muerta y escaecía. 

Porque, anque paeza mentira imaxinales nes llingües de los más "cabezaleros políticos" que pisen la Xunta Xeneral de nueso, eses nes que namás paez vivir la mediocridá y la sordera, dixéronse:

9 de mayu de 1808. Sesión de la Xunta Xeneral asturiana. En viendo la postura de dellos miembros del conceyu énte la invasión francesa, Joaquín de Navia Osorio, Marqués de Santa Cruz, llevántase y glaya esti discursu: 
La tierra que pisamos quisiera yo se abriese en este instante y nos tragase a todos para que sepultase en sus entrañas tanta pusilanimidad y cobardía. Quédense en su abyección y en su egoísmo los que se resignen a ofrecer sus cuellos a las argollas a que les remachará el usurpador, pero yo marcharé solo a encotrar sus legiones al confín de Pajares con un fusil, cuya bayoneta clavaré al primero que intente poner en él su planta. Me matarán y pasarán sobre mi cadáver, si no lo hiciesen pedazos; más la posteridad sabrá que hubo un astur leal y bizarro que murió resistiendo solo la invasión de este noble suelo".
A lo que respuende emocionáu l'alférez de navíu Manuel Miranda Gayoso:
 “Yo no tengo la dicha de haber nacido en Asturias, pero hijo adoptivo de tan noble país, seguiré al ilustrado y esforzado patricio, Marqués de Santa Cruz. No morirá solo, no: moriremos los dos, peleando en Pajares o en Arbás".
Otru tiempu, otra pasta. 


4/30/10

Ad Nihil

Don Xuan, convidástime a cenar, y equí toi.
—Don Giovanni (W. A. Mozart / L. Da Ponte). Actu II.

Don Giovanni - Il CommendatoreEl güercu llega puntual a la cita. El suelu del Campoamor casca y abre ente fueu, enllenando'l teatru d'una fumareda d'arrecendor sulfurosu. Con un glayíu espantible, Don Xuan cai a los infiernos una función más. Atrás dexa la so vida rellumante, la fuercia de la so mocedá, l'amor de milenta muyeres, bailles, bébores y amarraces a muerte al riscar. Tres d'él, el fulgor d'una partitura inmortal. Ver y sentir el Don Giovanni ye siempre enfrentase a la obra d'una intelixencia artística sobrehumana. Un Mozart maduru —giocosu y gayoleru nun segundu, terrible y tráxicu al siguiente— , texe nesta obra, como a cuentu risa, dellos de los momentos más granibles d'ente les sos composiciones (o, lo que ye lo mesmo, dellos de los momentos más cimeros de la música tonal y de la historia del arte humanu).

Na pasada temporada d'opera la OSPA tuvo al altor, el tenor Antonio Lozano rellumó como Don Ottavio y foi una sorpresa prestosa ver a Héctor Braga cola so mandolina virtuosa nel Deh vieni alla finestra. Pero'l que triunfa daveres ye, siempre, Mozart. El so gran ésitu en Don Giovanni ye l'ambigüedá cola que trata la vida'l personaxe. Xunto a aries picardioses y de comedia melguera, l'últimu actu, nel que la estatua del Commendatore ruempe a falar y a movese ente una música apavoriante, ye terroríficu. Yéralo nel sieglu XVIII y yelo entá anguaño. El mieu que guarden eses notes lléganos bien claru, como una amenaza esistencial: nun importa lo mozu o moza que seyas, lo bien o mal que vivas; lo único seguro na to vida ye que, a la fin, espera la nada.

Edward Elgar
L'inglés Edward Elgar foi unu de los últimos músicos románticos y unu de los últimos compositores tonales que vieron l'escomienzu del sieglu XX. Per un tiempu depués de la so muerte, na metá l'espoxigue de l'atonalidá,  la so obra escaecióse. Durante esos años, consideráronlu un compositor menor, anacrónicu. Vieyu, demasiao románticu pa la dómina de les máquines d'aceru y l'espresionismu. La vagamar de les modes culturales nun yera dalgo nuevo na historia de la música: el mesmísimu Johann Sebastian Bach tuvo cuasi 100 años n'escayencia y la so Pasión de San Matéu nun volvió a sonar dende 1736 hasta que Mendelssohn la rescatara nel 1829. Naide nun tuvo interés n'interpretala nesi furacu d'años.
Güei, tres el furacán esperimental atonal, la música d'Elgar queda vindicada dafechu. De la so mano salieron composiciones que namás podemos axetivar d'inmortales, mandándose d'un estilu delicáu y elegante, pintáu con unos paisaxes silentes y señardosos que, pembaxo, fierven d'emociones. Nes últimes selmanes del iviernu, colos castañeos desnudos y la ñeve llambiendo los montes —muncho enantes d'esti mayu verde de vida—, ye pa mi cuasi un ritu añal l'echar unes hores sintiendo les sos maraviyoses Variaciones Enigma. Música programática, pero astrauta y non figurativa, caúna de les variaciones xuega a ser un retratu de les amistaes del compositor. Una semeya musical de los sentimientos d'Elgar hacia les persones coles compartió la vida, plantegada como testamentu vital: el retratu de la so buelga na so esistencia.

El tema de la variación IX, Nimrod, —que, como informa la partitura, quier dibuxar una de les charres filosófiques ente'l compositor y el so amigu Jaeger, mientres pasien per una viesca n'iviernu—, aseméyase a una brisa nun crescendo constante que ruempe como una fola, como una rayada de sol seroñu ente la ñube. La versión de Daniel Barenboim, qu'equí apurro, entiende dafechu l'amor qu'escuende la partitura. Entiende que Nimrod ye, a cencielles, un instante musical máxicu, un momentu artísticu cimeru. Paga la pena parar el mundu, zarrar los güeyos y sentir:

Edward ElgarNimrod
De les 'Variaciones Enigma' (1898-1899) 
Daniel Barenboim y la Orquesta Sinfónica de Chicago

Les Variaciones Enigma son, como alvierte'l so nome, una cosadiella musical. Con too, l'Enigma tapecíu na partitura, el Tema musical dende'l que se desenrrollen les sos variaciones, nunca nun se descubrió. Yo creo, como dalgunos estudiosos apunten, que'l trucu ta en que'l tema nunca nun apaez nes variaciones. La música que fizo Elgar nelles cíncase nel Tema, pero nunca nun lu usa. El Tema esistiría, asina, sólo como pantasma, como vacíu. La nada que dexa l'ausencia del Tema ye lo que mueve y da aliendu a les Variaciones. El propiu compositor paez afalanos a esta idea:
"Nun voi esplicar l'Enigma —ye "xíriga tapecío" y ha dexase ensin resolver—  y, avísovos que la conexón ente les Variaciones y el Tema alcuéntrase les más veces na testura más sele; ye más, per ente y percima tola coleición "cuerre" otru tema estremáu y más grande, pero esti nun se toca... Asina que'l Tema principal nunca nun apaez, talamente como en dalgunes de les obres de teatru modernes... nes que'l personaxe principal nunca nun ta n'escena." - Edward Elgar
Ye un conceutu clarividente. La música alrodiu la nada, como la esistencia en metá de la non-esistencia.

• • • •
Dicía Mark Twain que nun-y tenía mieu a la Vacíu universalmuerte, a la non-esistencia, porque yá tuviera muertu per millones y millones d'años enantes de ñacer, y nun sufriera'l menor problema por ello. Na entrada anterior, víemos el tamañu del universu —o meyor, del multiversu— y estelábemos énte la cantidá y la enormidá de los oxetos qu'hai nél. Sicasí, dexábemos en papu —adré—  el so principal componente, eso qu'enllena la enorme mayoría del so espaciu y el so tiempu: el vacíu. Los noyos y supernoyos de galaxes tán separtaos per vacíos xigantescos que los superen en tamañu billones de veces. Solu, el Supervacíu Eridanu yá tien un diámetru aprosimáu de 500 millones d'años/lluz.

Amás, esti vacíu universal aumenta'l so tamañu en millones d'años lluz cada segundu terrestre. L'universu ta espandiéndose y los sos oxetos alloñándose por aciu d'una fuercia que remanez del segundu 1 d'esistencia, del Gran Españíu. Pero les teoríes de cuerdes y membranes d'anguaño yá nun creen qu'esi alloñamientu vaya ser pa siempre, nin que nel Bing Bang la materia surdiere ex nihilo. Por deceleración y gravedá, esti momentu d'espurrimientu del espaciu y la materia finará nel futuru. Si llanzamos contra'l cielu una xiga con un gomeru, xusto de mou perpendicular al suelu, va llegar un momentu del so vuelu nel que la fuercia d'aceleración de la xiga amenorgue hasta igualase cola fuercia de la gravedá. Tres d'esi momentu, la fuercia gravitacional impónse y la xiga cai al suelu. Del mesmu mou, delles teoríes amuesen que la materia del universu podría llegar a esi "momentu d'estabilidá" pa, darréu, entamar el procesu inversu d'axuntamientu. Los oxetos diríen entós averándose unos a otros, por gravedá, hasta que tola materia del universu tea xunto otra vez nel mesmu puntu, facCiclu universal Big Bang - Big Crunchiendo un Big Crunch (Gran Estrapallamientu) que llevaría a un nuevu Big Bang y a un nuevu entamu d'esti procesu cíclicu. L'universu, entós, podría ser una burbuya n'espansión y contraición cícliques: una riestra d'universos que ñacen y muerren nun llatir infinitu. El Retornu Eternu. L'alternativa ye una espansión y dixebra igual d'infinita. 

Contando materia escuro, antimateria y calculando les probabilidaes de membranes multidimensionales, vese que la densidá de la mayoría l'universu ye cercana a 0.
Pero non sólo l'espaciu llenda la esistencia, tamién lo fai'l tiempu: el Bing Bang foi hai 14 mil millones d'años, aprosimadamente; la Tierra esiste dende hai 4,57 mil millones d'años; la vida esiste na tierra dende hai mil millones d'años; los homo empecipiaron a asemeyase a lo que somos güei hai namás 200.000 años; el dolmen del Monte Areo tien, a lo más, 5.000 años.
La duración media de la vida d'un ser humanu na Tierra ye, na nuestra dómina, de 66 años y mediu. Dientro de 200.000 años, por evolución ñatural, l'homo sapiens yá nun va esistir. El Sol va morrer en 5 billones d'años. La nuestra esistencia ye, entós, un asocedíu minúsculu ente les llendes d'una nada cuasi infinita. Les nuestres allegríes y tristures son un instante tan pequeñu na historia universal, que nun podemos entendelu. Les bacteries viven de 20 minutos a unes poques hores y, nesi tiempu, aliméntense, desplácense y reprodúcense. En comparanza cola nuestra vida, la de so ye nada. Pero, si tuvieren la capacidá de percibir el tiempu, viviríen esos instantes, esos nanosegundos, cola mesma intensidá que nós vivimos los nuestros ciclos marcaos al debalu pol xirar de determinaes estrelles y planetes.

Horizonte

• • • •
La última composición d'Edward Elgar enantes de morrer foi'l Conciertu de Violoncello en Mi Menor, Op. 85. En 1919, cuando'l compositor esconsonó depués d'una operación, lo primero que fexo foi pidir llápiz y papel pa trescribir la melodía que se-y revelara nel pozu solombriegu de l'anestesia. Yera'l tema del primer movimientu del Conciertu. Tres les ferides de la Primer Guerra Mundial, Elgar quixo escribilu como una reflexón sobre la muerte y la mortalidá. El motivu principal de la obra ye, pal autor, la desapaición final y lo feble, momentáneo, de toa belleza y mocedá.
La obra nun gustó nel estrenu. Criticáronla por ser demasiao tráxica pa ser d'Elgar, famosu pola so elegancia. Pero, n'opinión del compositor, el problema foi que'l primer cellista que s'enfrentara a ella nun foi a entender la partitura y la so interpretación nun tuvo al altor. Per munchos años, el Conciertu diba escaecese.

Jacqueline du Pré
Tuvo una resurreición rellumante, sicasí, tiempu depués. La cellista Jacqueline du Pré apaeció na escena clásica mundial como un rellámpagu de virtuosismu, sensibilidá y mocedá. El so pendón interpretativu, dende l'entamu, foi'l Conciertu d'Elgar, pal que grabara les meyores versiones —consideraes güei "definitives" y "inmortales"—  a los 20 años, cola direición de Barbirolli o'l so mozu daquella, Barenboim. Nel entamu del sieglu XXI, depués de la versión de Du Pré, el Conciertu d'Elgar ye una pieza básica nel repertoriu de cualquier concertista de violoncello mundial. Y ye que Du Pré trespasó les muries de dificultá téunica que tenía la obra, pa concentrase na so emoción tapecida.

Pero, como si tuviera ciguada pol destín del Conciertu, la moza vieno a personificar el so argumentu. En 1973, con 28 años, nel cumal de la so carrera y siendo la cellista viva más renomada, diagnosticáron-y esclerosis múltiple. Esi mesmu añu, el dañu físicu torgó-y yá volver a tocar el cello. Morrió a los 42, cumpliendo la profecía del Conciertu d'Elgar.

Años depués, esistiría una nueva vida n'otres resurreiciones. Pero esa ye otra historia (1 y 2)...

Col tiempu, tolos mares van secase y tolos montes de la tierra van volverSable ente les manes al polvu. Tola nuestra historia, les nuestres llingües, les nuestres guerres y amores... Don Giovanni, Nimrod, el Conciertu de Violoncello y el recuerdu de Du Pré... Too comparte'l mesmu destín: desapaecer dafechu nel escaezu, fundise na nada.

Tenemos un momentu minúsculu. El Conciertu de Cello d'Edward Elgar recuérdanos en qué hemos gastalu. Nesta sociedá egocéntrica y aturullada, nesti sistema qu'usa'l nuestru tiempu y los nuestros enfotos como combustible d'una gran máquina económica, la mirada contra la nada valnos pa relativizar el so poder sobre nós.

La música d'Elgar calla'l ruíu y sana l'alma. Afuxir de la máquina y echar 45 minutos de la nuestra esistencia nel so Conciertu de Cello ye, daveres, aprovechar el momentu.

 Poro, lo qu'equí t'apurro ye un suerbu d'esistencia. Tástialu:

Edward ElgarConciertu pa Violoncello en Mi menor Op. 85
Jacqueline du Pré: Cello
Direición: Daniel Barenboim


(1) El cantar col que terminaba "Ex Nihilo" ta fechu, claro, de la versión de Jacqueline DuPré y Daniel Barenboim del Conciertu de Cello Op. 85 d'Edward Elgar.

(2) L'instrumentu Stradivarius col que Du Pré grabó'l Conciertu siguió faciéndolu sonar, munchos años depués de la enfermedá de la so ama. Güei, Yo-Yo Ma usa esi mesmu violoncello nes sos interpretaciones del conciertu.